31.
танкист
(14.03.2002 20:08)
0  
ЦIанагу, гъелисса оьрус купайкIагу шиннардил лахIан дурсса илтIасса хъачIунттайн руртун, ччангу ччаннайх бувтун, пIапI-пIапIгу тIий, кказитрал тикалуву бавхIусса аьнтсса сарибаш таммакулул пIапIрусгу тIий, Аьзихъал ккурчIав щядиркIун дусса ххуй ура ттула ниттил бава-Пари-аьжа (аьжа-дюкъуллал лугъатрай бава, нину тIиссар). Цинявппа шяравуссаннан дакIнийхтунусса дуну тIий, ттул амудадайн цумацанналгу гъели-кIукIлуну Пари-аьжай учайва. ЛяличIисса тура-хасиятрал инсан дия ттул амудада. Пари-ьажа оьсса къалиянчигу дия. КIана кIа яла гужма пIапIрус укуяргу махънин къадагьайва. ПIапIрусгу най дуна пачкалува къаучайва. 2-3 пIапIрус ттерирххун кказитрал касакраву цилла дахIайва ца цIурукIай.
-Пари-аьжай, - цIуххайссия - уздансса кIяла-кIюласса пачкалувасса къаувкуну, циван оькки-ххуйсса чагъарданул кьютIливу дархIусса учара? -куну. «Ттул арс, - учайва, пIапI-пIапI куну, пуркIурал ттурлугу лажиндаравух ппив дуллай, хIукуматрал итадаркьуминнува пуркIу чанну бачай, ххишалдаран, мурччайнгу лачIлачIисса дикIай. Ттун ххирар ттула канил дархIусса лахъи-хъаласса пIапIрусру».
АмудадачIа чан къашайва таммакулул «оьрус» пIапIрусрал луртанугу. (Пачкардаву ттучаннай дахлахими пIапIрусирттайн Пари-аьжал «оьрус» пIапIрус учайва). ЧIиравусса ишккаправу пIапIрусрал пачкардал чIанну дикIайва. Ттигу-шилагу дакIнийри: «Спорт», «Памир», «Дукат», «Северные»-цIанилусса пIапIрусру. Чан къашайва махоркалул къутив-къуршивгу, таммакулул ва тутундалул далухIивгу. Гьаннайсса, Пари-аьжа бия цIакьсса къалиянчи.
- Бавай, цукунна, ахир, ина пIапIрус тIий аьдат хьусса, куну, цIувххукун.
- Ахир пуч диву, Мажилави савав хьуссар, ттул арс, учайва. Мяйжаннугу, аму къалияндалухун дагьан Мажилави тIисса дюхъличу савав хьуну ия. Ччуччи багьну, ка-ччан занакьулу дан къабюхълай, щалва чурх щавурдахьхьун лавгун, шанийн агьсса МажилавичIа чIявуну ттул амудада личIайсса дия. Му пакьирнал, ччайнугу-къаччайнугу таммаклуя пIапIрус дархIуну, къашайшалал мурччаву дишайсса дия. Цаппара зурдардива, къашайшалаха, «къуллугъирайсса» амудадан ччан хьун бия таммакугу аьнтсса таммакулул кьанкьгу. ТIун диркIун бия пIапIрус. Сипта лагь-макну, авара къахьун лякIлай, лихълай.
-Пари-аьжай, ар, туну, Маживил ци барчаллагь бувна вин, зунттал хъаннийн хас дакъасса тIул-вардишгу вицIун лачIун дан сававгу хьувкун?
-Ци барчаллагь-я Мажилавил байсса анжагъ шинай цал, кIилва чан-кьансса, таммаку-за булайва.
Юх, Пари-аьжа чил канивун ялугьийсса дакъая. ХIатта шяравусса «цIанихсса» къалиянчиталгума учинмур, бахIинмур бакъа личIайхту, Пари-аьжачIан лаялий бучIайва. Пари-аьжалгу, инкар бакъа, гьарма лащу-щаллу увну, ххуллул айва.
Чумартсса дия ттул амудада. «Дулайсса ка мюхтажну къаличIайссар, ттул арс», - учайва. Гьич хъама къабитай, хIатта цимурцаннуя марцI бувккусса мяйцIалку шиннардил ахирданийгума Пари-аьжачIа чан къашайва учинмур. ДакIнийри тай шиннардий чIявуссаннал пIапIрусрал ххиличIрурдугума салкьи дуллай бикIайва. Ай-юх, ттул амудадал гьич цукунчIав пIапIрусрал ххиличIрурду къадатIайва. Амма, тай пIапIрус духларгсса шиннардий, Пари-аьжал цила увкусса пIапIрусру цачIу дихьлай,жиплил карщуву, къутуву салкьи дуллан дикIайва.
«Цанна, дадай, ина ми салкьи дуллалисса, вилния ттигу гьасса таммаку бур?» - куну, цIувххукун. - «Дакъара, ттул арс, гьич ка дихьлай дакъара. ХхиличIрурдал таммаку гьантта бувккун кьянкьа-кьурчIи шай, ттунгу, ттул арс, аьнтсса таммаку ччан бикIай», - учайва.
Пари-аьжа ччянияцIа советрал идаралий къатри бахьунугу зий дуссия. Цумаца райондалия учIайсса чIиви-хъунсса къуллугъчинал Пари-аьжан ссайгъат бикIайва-пIапIрусрал. ПIапрус сававну Пари-аьжащал личIи-личIисса тамашасса ишругу шайва. Цал, ца дарщусса кьини, кIюрххила арамтал идаралувун бавтIун, пIапIрусгу тIий, жаплий бивкIун бур. ПуркIурал цулкIригу кIутIу тIий, ваца, вярчIувух пуркIу кунма, дахьа аьч хьусса нузава най бивкIун бур. Ялун бивну бур райкомрал секретарь. Ва биявуршиву ххуй къадирзсса секретарь щарссанил: «Яр, зуния бакI чал хьусса арамтал буру, къабучIирхха, ахир, ва зула нину куннасса хъамитайпалул хIурмат къабуван. БучIиссаривкьай зун ва къари-бава пуркIурал кьюнураву бат дуллан. Хула, букки шичча», - арамтурайн ссивцIу бувну бур ванил. Циняв кьатIув буклан бивкIун бур. Буклакиминнавух, гьалбатта, Пари-аьжагу.
-Ина чунна, ниттил ссий вил хIурмат буручлайрахха вайннайх гъургъа буклакисса.
-Ай юх, нагурахха адимина, - чайва тIар Пари-аьжал, кьункьу ккутIава, кьацIлива пуркIурал цулкIригу нани буллай. Абавхъун, Пари-аьжал кIиссурттавусса «цIурупIайлий» тамашалий ливчIун бур райкомрал секретарь. Мукьахунмай, ци къуллугърай Дюхълив бучIарчагу, райкомрал секретарьнал Пари-аьжан ссайгъатран пачка пIапIрусрал булайсса бия. Ванил, хIатта, райондалул кказитрайн Пари-аьжая «ЛяличIисса къатрибахьу» тIисса чIири-кьирисса макьалагума чирчуну дия.
Цурда оьсса къалиянчи дунугу, Пари-аьжаща бювхъуна пIапIрусрал чулухуннай ттул дакI оьзан дурну, на къалияндалия уруччин. ХIакьинугу дакIнийри: «Ттул арс, пIапIрусрал инсаннал оьрму кутIа байссар, гьутрурдавунсса ххуллурду кIуврал гъул угъайссар, бащайссар. ПIапIрус учайма чурххал хIал чансса икIайссар, махъ-ихтилат лаласун къашайсса шайссар. Ттуя эбрат маласав, ттул арс, на бияла чансса къарира. ПIапIрус тIун дайдишайхтугу, ттухь ххуйри, оьккир учайсса чув акъая, на бияв ятин. Ина маучаванна, ттул арс, пIапIрус», - тIий, ттула хьхьичI лергъ тIисса, амудадал насихIатрал махъру.
Советрал къатри бавхуну дакъасса, Пари-аьжа пуч бачIунугу зий дия. Пучгу, байбихьулий архсса ИхIраччиял шярава ласайва. (Дюхълияту ИхIрахун 10 км манзил бур). Пуч буххайва мукьав. Чансса кказит-журналлу къачичайва шяраваллил агьулданул та чIумал. Нюжмардий кIива «зумацIун» бивну бувцIусса дарваг пучрал мукьав лавсун бучIайва 10 километралул манзилданий. Нюжмардий кIийла!.. Ай мискин, амудадай. Ликри чаннаннилъяв вил, бархI ва хъачIру муххалъяв?!
Бавай, хIакьинугу аьтIий ура ина битай ххуллурдай ва мукьав буххай кказит-журналлал гьивурдай!..
Шяравух пуч бачIин гьан айвав на.
«Ттул арс, - учайва, - кказит-журналлу кьатIатусса хайр-хавардур, тийн-шийнмай къабувну, цила чIумал заллухърунначIан биян бан аьркинссар. ЧIал хьурча, вайннуй чивчумур чулу хьуну бух шайссар».
Чагъарду ва ххаллу, ттуйн вихшала къадурну цила дачIайва. «Вай инсантурал хьул-тамахIрур, архниясса ссаламрур, хIатта кьадардугур, -учайва, - Вай канива канихьхьун булаван аьркинссар», - куну. Хъинну мякьну, ххарину, ххал бигьайссия танийсса кказит-журналлу: ХIайп тIий дикIайва Пари-аьжа лакрал кказит-журналлу къабучIай, тIий. Ттухьгу цIуххайва: «Вайксса вай оьрус мазрайсса циванни, жула лакрал бакъассарив я кказитру, я журналлу? На ччувччун най бикIара лакку кказит-журналлу ххиллан», - куну. Та чIумал, вай дия ряхцIалку шинну. Я Пари-аьжан, я ттун къакIула лакку мазрай «Дусшиву», «Зунттал хъами» буклай бушиву. КIулну бикIан бакъаяв ! Ттул амудада хьурдай тIий дикIайва лакку мукъух, лакку журналлу ххилан.
1975 шинал кьабивтуна пуч бачIул пиша. ЧIяву гъалгъарду ччисса, чил итталун, мукъулун дагьаймур дакъая ттул аму. Къатта бахьунугу, пуч бачIунугу зий ссум-аначну дикIайва. «КIира даврий зий ттуя рязи бакъа бухьунссар, ттул арс, инсантал», - учайва. Мунияту, чIявучил зума-ккарччуалун дагьаннин, дуркьун пуч бачIулмур пишалия, зуманив хьуна. Цалва кьакъабивтссания пуч бачIул пиша, валлагьий, ца щилкIуйгу буккан къабанссия. Ххирая Пари-аьжа дюкъуллан. Къаттабахьулмур даврий оьрмулухун зуй дия.
ЧIярусса шиннардий советрал къатри бахьуну зий диркIсса амун багьу-бизулул ххуллу-ххагу, шаттирахун тIиссакссагу, бучIи байсса кьануннал дуцин-даражагу, советрал зузалт хIала-гьуртту шайну тIий, гьарица байрандалул тарихгума лавхьхьуну бия. КIулнугу, царагу байран, 8-мур Март личIаннин кIицI къадайва. Хъаннил кьинимур чил дакъачIин, ляличIину хьунадакьайва. Байран кьини, нувщул ххункIругу байва. ХхункIру букангу, анжагъ ца ттуйн оьвчIайва. - Бавай, - чайссия - Яр ва Хъаннил байран дуна, ина щядикIу. ХIакьину ттунни виха къуллугъ буллан багьайсса.
-Ми оьнмасса хъаннил къудур махърур, ттул арс. Ми жунма аьркин бакъассар. Ачула вила ххункIру канан, -Каххурая увгьуну, хьхьичIун акьайвав.
Шайссияв инкар бан?!
Гьарица байран кьини, ттуламур чIири-хъуннасса бахшишгу ларсун, гьайссияв Пари-аьжачIан нувщул ххункIру букан. Ай аман, ца ишттахIсса, цIу-цIанпир бавкьусса, кIисри бушлансса, байва ттул амул ххункIру, жура-журасса кьаркь-урттугу хIала дурну. Дахьа кьюлтIа тIутIу. Неъмат!... ХхунчIащал, накI хIала дурсса накьлил ккулгу дуцIайва. «Накьлилми, ттул арс, кьунча байсса. ХхункIру хIажатшиврунни, накь чурххан бузшиврунни», - учайва. Увцуну щяитайвав, ваца, падишагь куна, ххунчIал синилух. ДуцIайва накьлил ккулгу. Цурдагу, ттуйн пуркIу къащун, бухкIуллух щядикIайва пIапIрусгу тIий.
Оьрмулухун къалиянчи дунугу, Пари-аьжал гьич ттуйн пуркIу щунну пIапIрус къаучайва. «Таммакул кьанкь къужрацIа дикIайссар. ЖагьилнацIа ранг-аьтрирдал, нахIу кьанкьру дикIан аьркинссар....» Ай, пакьир, ссая хьурчагу уручлай, яуллай дикIайссия на.
Ххарину дикIайва амудада, чIа-чIани Гьанжилия на лавсун учIайсса лакрал шаэртурал ва чичултрал луттирдаягу. «Литературалул Дагъусттан», «Зунттал хъами», «ЧIавалачин» журналлаягу. «Бавай, - учайссия, - Инара ккалай дакъанна мукссара ххари шара ина лакку мазрай чивчумуния», - куну. «Ттул арс, ацIа гьамин мунивурхха бусса. Буккин къашайманан чивчумур ттуршила ххирану бикIайссар. Жунма аьркинмур лакку хатIри», - учайва. Гужсса тарапчи дия аму Лакку Мукъул!».
Ххирая амудадан лакрал шаэртурал назмурдах ва балайрдах вичIилий щядикIангу. Ххирая лакрал тарихравасса хавардугу, халкьуннал лахъи балайрдугу. «Ттул арс, - учайссия, - оьнна чIун шайхту, бавачIан улухьхьу вила луттирду, журналлугу лавсун». Лагайссияв Пари-аьжачIан хаварду, шеърирду буклан нагу. ЧIиви оьрчI кунна виIчIилий щядикIайва. Цурдагу дакIних буклан дикIайва шеърирду хьуннав, лакку шаммарду хьуннав... «Ай-аман, ва пакьирнан буккин-чичингу кIулния ци дулланавав?-тIий икIайссияв. Гьаннайсса, ххирая ттул ххира амун дуллу дуниял!
Ялун най дур Пари-аьжан ххирасса Мартрал байран. Дакъар тти дунияллий ттул ххира аму. Ларгунни ахиратравун алжаннул ххари диву! Щилли ттун 8-мур Мартрал кьини нувщул ххункIру байсса, щилли накьлил ккулгу каниву дихьлай: «Ттул арс,-куну, ттул дакI зунттуксса дайсса?! Щилли?.. Абадравун лавгссар ттул Пари-аьжа, ятинну нагу кьаивтун.
Юх, гьич къаикIанна Пари-аьжал рухI ххари къадурну? Щарссанихь бан буванна нувщул ххункIругу, Пари-аьжал кунна дуцIа учинна накьлил ккулгу... ЩяикIанна ссупралух. Пари-аьжах алхIамгу буккинна, дуаьгу данна.
Барча вил байран куну, кулпатран ца хъункIултIутIигу дулунна.
Нагу ХIадисхъал ХIадис.
ш. Дюкъул.
|
