67.
Мустафа
(06.08.2002 11:47)
0  
Цала Ватан, цала миллат лавай баврил цIаний зий, захIмат буллалиманал цIа миллатрал ххазинар, миллатрал пахрур ва ххаришивур. Мукунми буруччаву, лавай бавугу миллатрал буржри. Ттул ялавайсса чан-кьансса ихтилат жула лакрал бюхттулсса чичу, шаэр, драматург, аьлимчу, инсаншиврул виувцIусса МахIаммад-Загьид Аминовлуятур.
МахIаммад-Загьид жуятува лавгун махъ, ттун буржлуну чIалай бияв нава ганая бусан. Амма жагьжил хъанай бияв: хьунавали ттущава ганал хъунмасса гьунарданун, аькьлукарнан, уздансса лаккучунан лайкьсса куццуйсса махъ ттущава бусан бюхъанавав, тIий.
ЧIярусса шиннардий тамансса давурттал иширттаву ттун кьисматну хьуссар гьам чичулт бавтIсса собраниярттай, съездирттай, чичултрал луттирду ххал бигьлагьисса лакрал секциярттай МахIаммад-Загьидлущал хьунабакьин, вичIи дишин ганал бусласимуних. Бусаймур, кIанин бувтун, бусайва. ТачIав лажинлякъу къадайва. Махъ иттав учайва. Мугу гаманан кумагну хьунсса куццуй.
ДакIний бур чIавасса чичултрал произведенияртту, съезд батIиннин ххал бигьин бавтIун бия лакрал чичулт. Гай бавтIминнаву, учин бюхъанссар, циняв чирчангу, гай бия шаэртал. Ганиннин тамансса луттирду итабавкьусса цIанихми шаэртал буслай бия цала-цала пикрирду. Жагьилсса шаэрталгу бия гайннал бусласимуних личIлулну вичIилий. ДакIний бур МахIаммад-Загьидлул ихтилат: «Жува шиккун, жура дуллалимургу кьариртун бавтIсса жагьилтуран жущава шайсса кумаг бансса нижатрайру.
Жува къааьркинссару вайннал произведениярттаяту кIиярасса цIарду дуллай, жагьилтал ххуллувату личин буллангу. Амма цукунчIав къабучIиссар тIайла бакъа, пикри къабувну, ялавайсса кьимат бищунгу. Варив хъиннува заралссар. Щин кIулссар жува цахьва учинмуних вичIилий бувкIсса вай жагьилтураву цума машгьурсса шаэр ялун личинссарив! Ванал дакIниву шаэрнаву бикIайсса пасихIшиврул чирахъ дахьа лахълай-къалахълай бикIан! Жува ихтилат бан аьркинни жагьилсса чичул дакIниву лархъсса шаэршиврул кIалай, гьунарданул кIалай лекъащаврищал ларай гьаз хьунну. Жува аьркинссару жущава шайсса кумаг жагьилтуран бан: аьйкьлакьимур ккаккан бан, ххуймунинсса ххуллугу чIалачIи бан. Щин кIулссар цума уссарив лакрал цIа машгьур дансса хъунасса шаэр, чичу, драматург».
Вай бия чIавасса шаэрнал дакIнивусса чаннал пиягь гьаз бансса ххуйсса махъру.
МахIаммад-Загьидлул шаэршивринсса ххуллу бигьанмасса бивкIун бакъар: заводрал зузала, университетрал физматрал студент, Яруссаннай математикалул учитель, яла Москавлив Литературный институт, издательствалул редактор, филологиялул элмурдал кандидат, С. Стальскийл цIанийсса премиялул лауреат.
МахIаммад-Загьидлул хьхьичIра-хьхьичIсса назму чирчуну дур 1956 шинал. Га «Ттул нину» тIисса назмулия махъ ганал итабавкьуну бур 30-нния ливчусса шеърирдал, поэмардал, хавардал ва элмийсса луттирду.
Урвавли цамагу лакрал чичултраву ваксса кутIасса оьрмулул мутталий вайксса луттирду чигу-чивчуну, дунияллийн буккан бангу каши хьусса цамагу чичу?! Цивппагу, гукунсса пасихIшиврущал ва куртIсса мяънардащал чивчусса!
МахIаммад-Загьидлул произведенияртту бур халкьуннал оьрмулущалгу, жула лакрал тарихращалгу бавхIусса, гай бур пасихIшиврувух экьинанисса. Тамансса шеърирду композитортурал цала макьаннавун лавсун бур.
ПасихIсса, дакIнивун бюхлахисса бур буттал кIанттухасса, дусшиврухасса, тIабиаьтрахасса, эшкьи-ччавриха ва талихIраха чивчусса шеърирду: «ТIутIал къупру», «Щюллисса марч», «Ххазина», «Къюмайрду», «Тарихрал ссигъри», «Абадул мурад», «Мажмуннул мурад», «Хъусращиял Чарххудай» ва цайми. МахIаммад-Загьидлул луттирду, букку чIарах увккун, кьабитансса бакъар.
Тарихраясса поэмарттал буккул дакI тирх чин дуллай дур жула лавгмунил тарихраву жунна ккаккиярттуну кьариртсса жула ппухъруннал виричувшивурттал.
Прозалийсса МахIаммад-Загьидлул произведенияртту бур букку тяхъа-хъяхъи уллалисса, оьрмулувусса диял дакъашивуртту дащуй дихьлахьисса.
ЧIярур ванал таржумачи хIисаврайгу дурсса давуртту: Р. ХIамзатов, Тютчев, А. Фетлул, А. Блоклул, М. Горькийл, М. Лермонтовлул шеърирду лакку мазрайн бувцуну бур. Бур ванал луттирду оьруснайн бувцуну, бувкссагу.
Ттигу дакIнийн багьунни МахIаммад-Загьидлущалсса хьунабакьавривусса ца укунсса ихтилатгу. Най дия Дагъусттаннал чичултрал съезд. Хьуна перерыв. Лак, цанначIан-ца хьуну, лахъ трибуналия махъ лахълахъиминнайн багьуна. Махъ лахълахъиминнал увкумуний бацIлай, ххуйчулий циняв рязину зумух лавссуна Ю. Хаппалаевлул Дагъусттаннал цайми-цайми миллатирттан кунма, аьркинну бушиврий лакрал миллатрал кказит.
КIия, трибуналия махъ лахълахъиминнал увкумуний бацIлай, кIайннал бусласимуниву къеппул бугьансса, вари учинсса цичIав къалякъаврия, ягу кIайннал аьркинмуния арх бувцсса ихтилатрай бацIлай бия. Циняннах вичIилийгу ивкIун, МахIаммад-Загьидлул увкуна:
-КIай лахъ трибуналия махъ лахълахъиминнан хъама битан къааьркинссия цивппа цала-цала миллатирттал вакилталну вичIи дирхьуминнан чIалачIишиву. КIайннансса кьиматгу щалава кIа миллатран вичIи дирхьуминнал бишлашиву.
Мяйжаннугу, жува буру чIявусса миллатирттал инсантуравух хIалану зийгу, занайгума, жура-жура дуллалимуниллав, бусласимуниллав кьиматгу гайннал жула щалава миллатран бишлашишиву, дакIний битан аьркинни.
ЦIанасса ва демократиялийн букканни хьхьичIсса шиннардийсса лакрал дакъагу, Дагъусттаннайсса арулва миллатрал оьрчIансса литература, учин бюхъанссар, тIутIайх дичлай дия. Мунилгу хъунмасса кумаг хьуна школарттал оьрчIансса учебникирттаву цала-цала кIанттурдаясса, цала-цала халкьуннаясса материаллу дичаврин.
Гай жужирттансса рукописьру бакIрайра рецензентнащал ялагу кIия-шама чичул дуккайссия. Яла, бавтIун, секциялий ххал дигьайссия. Му ишираву МахIаммад-Загьидлул кьиматрах циняннал аякьа хъуннассия. Га батIавривух гьуртту шайссия Ю. Хаппалаев, ХIамзат Муркъилинский, А. ХIусайнаев, Н. Юсупов, Б. Рамазанов, М. МахIаммадов, М. Аьлиев, Минкаил Аьлиев. Цуксса хIайпнугу, вайннавату чIявуми аьпалухьхьун лавгунни.
Ттула хъунмурчIин даву оьрчIру тарбия баврицIун, оьрчIансса учебникирттацIун, миннан хас бувну чивчусса хавардацIун бавхIусса бухьувкун, на бацIанна оьрчIанни тIий чивчусса МахIаммад-Загьидлул ца хъунбакъасса хаварданий. Мунин цIа дур «Ахиргу ляркъусса хIилла».
Хавардануву букку хъанахъимунища, хьумунищал цакуну бакIрайва кIул уллай акъар. Му хъанай бур цалниял цал. Гиву гьуртту хъанахъимигу бакIрайва буккул хьхьичI бихьлай акъар автор. Ванилгу букку гихунмай хьунмур кIул баврин кIункIу уллай ур. Яни хъанахъимур хьхьичIунмай нанавриву ва га ттирихлахавриву. Мазгу гайннал цала-цала оьрмурдан хасъсса бур.
Хаварданул геройталсса оьрчIру ххал бувала цукун буккул хьхьичI бихьлай урив: «Къатлуву ия кIия» - тIий ур. КIия оьрчI тIий акъар. Гихунмай яла кIул хъанай бур гай кIиягу бушиву цаннасса хасиятирттащалсса инсантал - цанма-цанма аьркинмунил цIаний ччимур хIилла дуллалисса. Амир ур хъихъи. Ганал дукра дуканшиврул, ганан ччи-ччимур хъуниминнал буллай аьдатсса. Мува му га хIиллардайну тIалав буллай ур 6-чинмур классрал ученик ХIамзатлуягу. Биялсса аькьлу зикрилул заллусса Амирдул (5 шинавусса) кIунттивун лавсун бур нинугу, бавагу. Дукралун кIанай кканпIитIирттай дузалгу хъанай ур. Амир ур ХIамзатлуйн дукра дукан ан тапшур увну.
Амма Амирдул кулунг чарихун дахчилай дур. ХIамзат Амирдуйн мютIий хъанай акъар. ХIамзатгу ляхълай ур Амир мютIий ан личIи-личIисса багьантту. Ялун личлай бур га чIивисса хавардануву оьрчIал цала-цала хасиятру. ЧIивисса хавардануву так-туксса калималуву хасият чIалачIи дан бюхъавурхха чичул гьунар.
Хавар буккун хIаз бизанну най бур. Ялагу авторнал ца бивтун - кIива бутлай ур. Хавар бур цала оьрчIан ччи-ччимурду буллай, гай тIул дакъа аьдат буллалисса нитти-буттанссагу дарс. Аммарив хавардануву бакъар цукунчIавсса аькьлу бусласаву. Му чIалачIи буллай ур автор гай оьрчIал дуллалимунину. Шиккува ялагу учин бюхъанссар чIивисса хавар чичлачисса чичунсса ккаккиянугу хьун бюхъансса бур ва хавар.
ЧIярусса назмурду дур, аьпа биву, МахIаммад-Загьидлул кутIасса лагрулий оьрчIан хас дурну чирчуссагу. Гай дур пасихIну куртIсса мяъналийсса, оьрчI пикри буллали уллалисса. Ми дур хавардайну дакъагу, назмурдайсса.
МахIаммад-Загьидлун кIула зунттал оьрчIал хасиятру, тIул-тIабиаьт, гайннал дакIурдин кьамул шаймур ва къашаймур. Мунияту бухьунссар ганал оьрчIан хасну чивчусса шеърирдугу, хавардугу гакссава цIубусса пасихIсса, дакIурдиву личIлачIисса ва чIявуми школарттал учебникирттаву бивщусса.
Ххал буварала гай кутIасса шеърирдал пасихIшиву, пикрилул вибуцIаву
КIива бияй ккаччи
Хьунабавкьуна.
Амма цаннилвагу
«Бивзрав» - къакуна.
БучIир, къабучIир, - тIий
Пикри буваннин,
КIялул энчI дуруна,
ЛухIулгу аьч бувуна
Оьккисса ххутIив
(«Оьсса ккаччан хьумур» - тIисса шеърилувату).
Ахиргу биллалисса туллая ххуллий личIлай бур ца къунчу. Авторнал иширайну чIалачIи буллай ур биллай-талатаврину царагу чулухаллин мюнпат бакъашиву.
«Гьунарду» тIисса шеърилул букку тяхъа уллай, пиш учин уллай ур.
- Вища ци дан шай, Аьлишай?
- Вай карунний ачин шай.
- Вища ци дан шай, Оьмаршай?
- ЛавчIун, ччима утан шай,
- Вища? Вища, Бахттуншай?
- Ттуща, ттуща къавтIун шай.
....................................
...................................
Ина ци чинна, Пашай?
Ттуща шай, ттуща къашай...
Щивщу-хъюру дукан шай.
Чариву чаннацIуртти
Чувнал дакIниву гьунар, - тIий ур МахIаммад-Загьид.
ЩинчIав, ссанчIав кумаг къабайма автор лащан уллай ур хIайвандалуха.
ХIайвандалун лащай
Тахлий тамбалгу,
Лякьа дуван акъа
Къаизай гагу.
Дуллу дунияллий ниттияр ххуйссагу, ларайссагу цичIар дакъашиву МахIаммад-Загьидлул оьрчIан укун дакIнин бутлай ур:
Мяъ тIий ца гада аьтIий бур арив.
Ци кIулли ци дакъа аьтIий буссарив?
Урттугу дур арив, тIутIал къатIригу.
Ци уртту дунугу, аьтIий бур гада.
Ци кIулли ци дакъа аьтIий буссарив?
Ххютругу дур арив, гъелисса баргъгу
Бургъилу пар-пар тIий чIивисса бяргу.
Ци бярду бунугу, аьтIий бур гада
Цукунсса бунугу, гада бур гада.
Чуври тIий бухьунссар ттул ххира дада.
Учпедгизраву зузиссаксса хIаллай ттун багьайва гьам учебникирттал, гьам оьрчIансса хавардал, шеърирдал рукописьру учительтурахьхьуннав, шаэр-чичултрахьхьуннав ххал дан дулун ва гайннун луттирансса кумаг шаву мурадрай цала пикри рецензиялий чичин. Учала буссархха, лякъинна тIий лугларчан, ккунукравугу чIара лякъин бюхъайссар, тIисса. ДучIайва мукунсса рецензиярттугу, гужрай аьйрду ляркъуну, цивппа хъиннува аькьлукарталшиву бувчIин буллалисса, кумаг чансса шайсса. МахIаммад-Загьидлулми рецензияртту кутIасса, мяърипатрайсса дикIайва. Амма луттиран кумагну шайва ганал га руписьрал полярдай мюршну карандашрах дурсса чичрурду. «Ва кIану укун баххана барчан къахъинав? Инава пикри ба!» - тIий. «- Ахир укун дучIан дарчан къахъинав? Ва шеърилул тема вайми кIива шеърилулгу тикрал дуллай бур». Укунсса рецензия кумагну шайва авторнангу, издательствалунгу.
Ттул ттула «Арсурваврал тавхана», «Цуякьай ттул ппу?», «Барзултрал кюртти байний» тIисса цIардащалсса луттиран МахIаммад-Загьидлул чирчусса рецензияртту кумагранссану хьуна. Бунагьирттал аьпа баннав цал! ХIакьинусса кинигу барчаллагьращал дакIнин дичара.
ОьрчIан хасну МахIаммад-Загьидлул чивчусса жужру тамансса на учпедгизраву итагу бавкьуссар.
МахIаммад-Загьид инсаннан ка-кумаг бан кIункIу тIиссагу ия. Ттул «Бидавгу, баргъгу, нагу» тIисса жужрансса таржумачи цащала Литинститутраву Москавлив дуклай ивкIсса Н. Терехов лявкъуна. Му лу дагъучпегизрай оьрусрай бувкссия. Мунийну ттунгу, Н. Тереховлунгу кумаг хьуна.
ЦIуницIа дакIнин утанну жущава лавай ангу, уруччингу къабювхъусса Лакрал хъунасса шаэр, чичу, драматург, аьлимчу инсансса инсан МахIаммад-Загьид Аминов.
Курзи Къажлаевал.
|
